Яңалыклар

Әл-Мәрҗани мәчете имамы “Мәдәният һәм диннең үзара бәйләнеше” дип исемләнгән халыкара конференциядә катнашты

13 декабрь көнне Казахстан Республикасының Актүбә шәһәрендә “Мәдәният һәм диннең үзара бәйләнеше” дип исемләнгән халыкара конференция узды. Әлеге чарада Әл-Мәрҗани мәчете имамы Рамил хәзрәт Миңгәрәев катнашты һәм доклад сөйләде. 

 

Әл-Мәрҗани Җәмигъ мәчетендә Мәүлид ән-Нәби бәйрәме уздырыла

18 декабрь көнне Әл-Мәрҗани Җәмигъ мәчетендә, Пәйгамбәребез Мөхәммәт (с.г.в.)нең туган көне уңаеннан, Мәүлид ән-Нәби бәйрәме уздырыла. Бәйрәм чарасы Казан ислам көллияте, Казан шәһәренең Вахитов һәм Идел буе районнары мөхтәсибәте һәм Әл-Мәрҗани Җәмигъ мәчете каршында эшләп килүче хатын-кызлар курсларында белем алучылар белән берлектә уздырыла. Бәйрәм сәг.10:00 башлана.

Хатын-кызлар курсларында белем алучылар Мәүлид ән-Нәби бәйрәмен уздырды

Бүген, 13 декабрь көнне, Әл-Мәрҗани Җәмигъ мәчете каршында эшләп килүче хатын-кызлар курсларында белем алучылар Пәйгамбәребез Мөхәммәд (с.г.в.)нең туган көне уңаеннан – Мәүлид ән-Нәби бәйрәмен уздырды.  Пәйгамбәребезне олылап оештырылган чарада Коръән уку, Пәйгамбәребез турында мөнәҗәт, касыйдәләр әйтү булды.

Әл-Мәрҗани Җәмигъ мәчете каршында эшләп килүче хатын-кызлар курслары атна дәвамында көн саен эшләп килә. Дәресләргә йөрүчеләр намаз тәртиләренә, гарәп телендә Коръән уку, ислам динендәге сөннәт һәм мөстәхәб гамәлләр турында белем алалар.

Әл-Мәрҗани мәчетендә Татарстан мөфтие һәм Төркиянең Дин эшләре идарәсе вәкилләре кунакта булдылар

Бүген Әл-Мәрҗани Җәмигъ мәчетендә Татарстан республикасы мөфтие Камил хәзрәт Сәмигуллин һәм Төркиянең Дин эшләре идарәсе вәкилләре кунакта булдылар. Кунаклар арасында Төркия дин эшләре идарәсенең Коръәнне тикшерү һәм өйрәнү департаменты җитәкчесе Шахин Хафиз Осман, Төркия дин эшләре идарәсенең Дини басмалар департаментының директоры Салман Юксель бар иде. Әл-Мәрҗәни мәчете имамы Рамил хәзрәт Миңгәрәев һәм Мансур хәзрәт Мифтяхов дәрәҗәле кунакларны мәчет белән таныштырдылар һәм аның тарихын бәян иттеләр. Шулай ук кунакларга Мәрҗани мәчетендә эшләүче “Безнең никах” студиясе һәм “Балалар” сабыйлар үзәген дә күрсәттеләр.

Ак мәчеттә Мәүлид ән-Нәби бәйрәме узды

Бүген тарихи Болгар шәһәрендә  Мәүлид ән-Нәби бәйрәме узды. Мөселман өммәте өчен кадерле булган Пәйгамбәребез Мөхәммәт (с.г.в.)нең туган көнен зурлап уздыру чарасы “Ак мәчет” комплексында үтте.

Россия күләмендә уздырылучы Мәүлид бәйрәмендә Татарстан Республикасы җитәкчелеге, Россиянең төрле төбәкләреннән дин әһелләре, җәмәгать һәм сәясәт эшлеклеләре катнашты. Җыелган кунаклар алдында Татарстан Дәүләт Киңәшчесе Минтимер Шәймиев, Россия мөселманнары Үзәк Диния нәзарәте рәисе, Югары мөфти Тәлгать Таҗетдин, Россия Федерациясе мөселманнары Диния нәзарәте рәисенең беренче урынбасары Рушан хәзрәт Аббасов, Татарстан мөселманнары Диния нәзарәте рәисе Камил хәзрәт Сәмигуллин чыгыш ясадылар. Бәйрәм программасы кысаларында мөнәҗәтләр, салаватлар әйтү булды. Бәйрәм салют һәм лазерлы шоу белән тәмамланды. 

Казан шәһәренең Вахитов һәм Идел буе районнары мөхтәсибәтеннән әлеге гүзәл чарада мөхтәсибәт аппараты җитәкчесе, Вахитов һәм Идел буе районнары мөхтәсибинең ярдәмчесе, Әл-Мәрҗани Җәмигъ мәчетенең имам-хатыйбы – Рамиль хәзрәт Миңгәрәев катнашты.

Мөселман зираты хезмәткәрләре Батырлар күмелгән каберлекләрне чистарттылар

РФ Дәүләт Думасының 1995 елгы 13 марттагы 32нче номерлы “Россиянең хәрби дан көннәре һәм истәлекле даталары турында”гы Федераль законы нигезендә, 9 декабрь – Россия Федерациясендә “Ватан батырлары көне” буларак билгеләнеп уза. Әлеге көнне без сугыш яуларында һәм тыныч көннәрдә күрсәткән батырлыклары өчен  югары дәүләт бүләкләренә лаек булган Батырларны олылыйбыз.

Шушы истәлекле көн уңаеннан Әл-Мәрҗани Җәмигъ мәчете карамагындагы Мөселман зираты хезмәткәрләре Батырлар күмелгән каберлекләрне чистарттылар, мемориаль төзелмәләрне һәм хәтер такталарын тәртипкә китерделәр.

 

Мәрҗани мәчетендә “Россиянең дин әһелләрен берләштерүдә Мәрҗани мәчетенең роле" дип исемләнгән түгәрәк өстәл узды

7 декабрьдә Казанның Мәрҗани мәчетендә “Россиянең дин әһелләрен берләштерүдә Мәрҗани мәчетенең роле: Ишмөхәммәт хаҗиның тормыш юлы, мирасы” дип исемләнгән түгәрәк өстәл узды.

Очрашуда күренекле дин әһеле, остаз Ишмөхәммәт Зәитовка (1752-1841) багышланган китап киң җәмәгатьчелек игътибарына тәкъдим ителде. Китапның авторы - Россия һәм Башкортстанның Язучылар берлекләре әгъзасы Гали Гатауллин. 

Түгәрәк өстәлдә Татарстан һәм Башкортстан галимнәре, дин әһелләре, җәмәгатьчелек вәкилләре катнаштылар.

Чараның оештыручылары булып Әл-Мәрҗани Җәмигъ мәчете һәм Бөтендөнья татар конгрессының Казан бүлекчәсе торалар.

Мәрҗани мәчетенең матбугат үзәге

 

Әл-Мәрҗани мәчете мөселман балалары өчен кышкы ял сменасын үткәрергә планлаштыра

2016 елның 28-29 ноябрь көннәрендә Казан шәһәре Вахитов һәм Идел буе районнары мөхтәсибенең төшелеш эшләре буенча урынбасары һәм бер төркем белгечләр Югары Ослан районының Ташкабак (Ташевка) авылында урнашкан балалар лагерында булып кайттылар. Әлеге ике көн аралыгында алар лагерь объектларын кышка әзерләү буенча эшләр башкардылар.

Ташкабак авылында урнашкан лагерь советлар вакытында "Космический" пионерлар лагеры буларак эшли, ләкин СССР таркалгач кирәксез булып кала һәм 12 ел буе ташландык хәлдә була. 2005 елда әлеге лагерь объектлары (төгәлрәк әйтсәк, җимерелгән һәм җирле кешеләр тарафыннан сүтеп, урлап киткәннән соң калган нигезләр ) Әл-Мәрҗани Җәмигъ мәчете карамагына бирелә. Мәчет җитәкчелеге тырышлыгы белән лагерьның шактый биналары кабаттан торгызыла, яңа җәйге йортлар төзелә. Лагерьдагы йортларга өр-яңадан электр, су кертелә, территориясе чистартылып койма белән тотылып алына һ.б. эшләр эшләнә.

2005 елдан башлап бүгенге көнгәчә әлеге лагерь, җәйге яллар вакытында, Казан ислам көллияте һәм республикабызның башка дини уку йортлары шәкертләрен кабул итеп килә. Яңа елда Мәрҗани мәчете мөселман балалары өчен кышкы ял сменасын да оештырырга планлаштыра. Бу үз чиратында мөселман балалары агымын тагын да арттырачак дип гөман кылырга этәрә.

Мәрҗани мәчетенең матбугат үзәге

 

“Әл-Мәрҗәни” мәчетендә Ишмөхәммәт хаҗи Заитовка багышланган түгәрәк өстәл узачак.

7декабрь көнне “Әл-Мәрҗәни” мәчетендә Ишмөхәммәт хаҗи Заитовка багышланган түгәрәк өстәл узачак. Әлеге чара кысаларында, танылган дин эшлеклесе Ишмөхәммәт хаҗиның тормыш юлы һәм эшчәнлегенә багышланган китапны да тәкъдим итәчәкләр. Китапның авторы Башкортстан  республикасы һәм Россия язучылар берлеге әгъзасы – Гали Гатауллин.

Түгәрәк өстәл сәг.11:00 да башлана.

Пресс-служба мечети Аль-Марджани

Россия ислам институтында квалификацияне арттыру буенча курслар узды

30 ноябрьдән 2 дакабрьгә кадәр Россия ислам институтында квалификацияне арттыру буенча курслар узды. Лекцияләрене Фикх, Акыйдә, Үсүл әл-фикх фәннәре белгече, шәригать фәннәре докторы Шәех Сайф Әл-А'сри укыды.

Квалификацияне арттыру буенча курслар узучылар арасында Казан ислам көллияте укытучылары һәм Казан шәһәренең башка дини уку йортлары мөгаллимнәре бар иде.

 

Битләр